Майаҕа САХА-РЭП хайысханы бастакылар кэккэлэригэр төрүттэспит Александр Теряков-САШ.Т айар киэһэтэ

Описание

Алтынньы 31 күнүгэр МАЙАҔА - САХА RAP саҕыллыбыт сиригэр, бастакылар кэккэлэригэр бу хамсааһыны төрүттэспит Александр Теряков-САШ.Т айар киэһээтэ буолан ааста.
Александр Теряков Д. Ф. Ходулов аатынан норуот айымньытын дьиэтигэр 2012 сылтан звукооператорынан үлэлиир. Оскуолаҕа үөрэнэ сылдьан Сахалыы саҥалаах народнай эдэр көрөөччү тыйаатыр “Үрдэл” продюсерскай киинин (сал. Г. Васильев-JEADA) иитиллээччитэ. 2005 сыллаахха аан бастаан Майаҕа ыытыллыбыт Өрөспүүбүлүкэтээҕи “САХА RAP” күрэҕин кыайыылааҕа.
Ураты тыыннаах музыка түһүлгэтигэр бу күн кыттыыны ыллылар Александр доҕотторо ADIRAY RE, SAMOR, ДОРҔООН ДОХСУН, ЛИНДА ЗАХАРОВА, “ХАРДЫЫ” ГАННИБАЛ уонна “DANKETSY”, “SIMBIOZ”, “CHURAPCHIKANO BULLS” рэп-бөлөхтөр, түһүлгэни музыканан киэргэттэ DJ DANCER DANCEROFF. Александр түһүлгэтин бэйэтэ тыыннаан иилээн-саҕалаан ыытта. Александр айбыт хоһоонноро, хомоҕой уус тыллаах ырыалара, саалаҕа мустубут дьону сөхтөрдө, уйулҕаларын хамсатта.
Айар куттаах доҕорбутугар, кэллиэгэбитигэр өр сыллаах айымньылаах үлэтэ сыаналанан, “САХА ӨРӨСПҮҮБҮЛҮКЭТИН КУЛТУУРАТЫН ТУЙГУНА” бочуоттаах бэлиэни, ону тэҥэ, “Мэҥэ Хаҥалас улууһа” муниципальнай оройуон дьаһалтатын “Оройуон иннигэр өҥөлөрүн иһин” остуолга ууруллар бэлиэлээх грамотата, “Майа сэлиэнньэтэ” тыа сирин түөлбэтин баһылыгын харыга кэтэр чаһылаах бочуоттаах грамотата уонна улуустааҕы култуура уонна духуобунай сайдыы салалтатын бочуоттаах грамотата тэрээһиҥҥэ мустубут дьон дохсун ытыс тыаһынан арыаллатан үөрүүлээх быһыыга-майгыга туттардылар.
Александр Теряков айар киэһээтин тэрийбитинэн эҕэрдэ тыл эттилэр -улуустааҕы култуура уонна духуобунай сайдыы управлениятын салайааччытын солбуйааччыта Александр Кулешов, улуустааҕы социальнай бэлиитикэ управлениетын салайааччыта Октябрина Кулешова, “Майа сэлиэнньэтэ” тыа сирин түөлбэтин баһылыга Алексей Неустроев уонна бииргэ үлэлиир кэллиэгэлэрин ааттарыттан Д. Ф. Ходулов аатынан норуот айымньытын дьиэтин солбуйааччы дириэктэрэ Михаил Попов.
Хомоҕой тыллаах, ураты тыыннаах, угуйар тэтимнээх САХА RAP – эдэр ыччат ортотугар олус киэҥник тарҕанан, саха култууратын аныгылыы көрүҥүнэн сайыннарар, саха тылын чөлүнэн хаалларыыга, эдэр ыччаты төрөөбүт тылынан айар үлэҕэ угуйууга улахан оруолу оонньуур. Дьоҕурдаах оҕолору, саҥа ааттары таһаарыа диэн эрэнэбит.

Доҕорбутун, кэллиэгэбитин, талааннаах ыччаппыт Александр Теряковы-САШ.Тны “САХА ӨРӨСПҮҮБҮЛҮКЭТИН КУЛТУУРАТЫН ТУЙГУНА” үрдүк бочуоттаах бэлиэни туппутунан итиитик-истиҥник эҕэрдэлиибит!
Ситиһииҥ эйиэхэ кэрэхсэбили уонна ытыктабылы аҕаллын. Айымньылаах үлэҕэр өссө үрдүк таһымнары дабайа тур! Дьолуо уонна үтүө өйүк аргыстастыннар!